地產代理監管局新任執行總監方安妮，馬年正式返工，噚日喺春茗首度露面。佢外表斯斯文文，查實好猛料，曾效力香港警隊27年，擔任過衝鋒隊、警察機動部隊（PTU）等職務。佢媽媽仲係大家熟識、以前經常喺公仔箱教人煮餸嘅方太（方任利莎）。
媽媽係煮餸高手，方安妮當然愛煮又愛吃，身形咁弗，秘訣係跑步，佢每朝都要跑完步先返工。
佢以前喺警隊相當勇猛，約十年前，佢擔任旺角警區行動主任，負責指揮同掃蕩區內黃賭毒活動，以鐵腕整頓區內治安，曾於一年內拘捕逾6,000名賣淫女子，呢個紀錄仲未被打破，所以有「殺雞女督察」外號。方安妮丈夫係警務處前助理處長黃敦義。
自言流「P」型血
方安妮9歲就立志做警察，原先打算做到退休，點知做咗27年，2010年喺佢47歲嘅時候突然劈炮唔撈，當年佢接受訪問時只係話被人指不務正業，所以劈炮，具體原因就冇講，應該都係唔開心咁走。之後佢走去全職讀書，修讀博士課程，馬年重出江湖。
佢噚日自我介紹時話，自己嘅血型係「P」型，意指警隊（Police）嘅血，可見佢唔多唔少都有些少懷念從前，以佢嘅作風，代理們都要打醒十二分精神嘞。佢坦言，地監局近年致力進行各類宣傳同教育工作，提高市民對買樓嘅認知，相信自己過往嘅執法經驗，會有助處理局方職務。
李華華
mailto:[email protected]