立法會金融服務界議員張華峰噚日同傳媒春茗時，畀條好橋港交所（388）CEO李小加，既然李小加咁想阿里巴巴來港上市，阿里創辦人馬雲又堅持要用同股不同權嘅形式，咁阿里可以考慮喺創業板上市，創業板改例可能可以寬鬆些少咁話。
張華峰之前對阿里以同股不同權形式上市嘅態度都幾強硬，認為監管機構應先保障投資者。但最近佢聽到好多聲音話想阿里來港上市，估計將來亦有好多科技公司來港上市，咁不如考慮活化創業板，由阿里行先，但要講明呢個板係高風險。
張華峰本身亦有投資科網股，仲要早於2005年以每股5元左右買入舊年「股王」騰訊（700），騰訊噚日收報508.5元。可惜嘅係，張華峰當年冇選擇長期持有，升一倍就獲利，之後買吓賣吓，騰訊升超過300元之後，佢就冇再玩，否則真係發達喇！