【本報訊】被業主狠批專搵港人笨的「港人港樓」房協深水埗喜雅，自一個全屋多處生銹單位報道出街後，不少業主憂心忡忡，分享收樓質素心得。
恐破壞鄰里關係
日前被驗出單位多處生銹的業主表示，房協暫未聯絡跟進，將會在繳交執漏表內提出修補及執漏。不過，他最擔心，仍然是平台之間沒有阻隔的問題，「希望房協主動興建圍板啦，因為自己同鄰居傾，且牽涉錢銀，好容易破壞鄰里關係。」一提起平台零阻隔，他又無名火起：「呢個本身係發展商責任，點會要業主做圍欄㗎！」
其他喜雅業主陸續收樓，並在討論區分享收樓情況。有網民表示：「收咗樓了，整體質素不錯，表面睇，無發覺有甚麼問題（同報道嗰個單位好唔同！），只係有少許地方生銹，例如窗鉸，個人認為可以接受，畀80分。」另一網民回應：「咁你好彩了！我睇一個高層單位，生銹不嚴重，但浴室洗手盆有一尺長裂痕，且漏水不能用，浴室門口的地板空心，跳一下有滋滋聲……在睇樓時有房協職員來，問他維修需多久，約需四星期，若要訂貨就要等更耐。」
此外，有業主搵驗樓師收樓後表示：「生銹係有嘅，主要係浴室，其他地方如窗鉸就唔覺有。廚房、廁所試水都有漏水，要執漏。批盪都有部份空心，要執。玻璃有塊崩咗，要全塊換……」。有網民嘆道，點解縱容地產商幾百萬嘅樓咁樣交貨？反映市民之間對樓宇質素極為關注。