最近網上港燦最眾口交譽的妙文，肯定是作者署名史兄的《澳牛的黃昏》，由港九四大奇菜寫到港人墮落，旁及阿爺如何毀滅原住民的傲嬌陰濕治港，粗口橫飛笑中帶淚。網民熱衷討論的課題，原本圍繞着光速餐那份變得「又鞋又凍」的炒蛋，不過一如所料，很快便轉為阻街內地喼客引發的中港之爭。土豪和他們的五毛黨那種「冇咗我哋接濟你哋一個二個實餓死」腔調，聽見都嘔足三日三夜，恕我不奉陪了，不如集中注意力欣賞作者深厚的粵語書寫功力。
文中那家澳洲牛奶公司，據說服務員以「視客人為乞兒」見稱，「去食澳牛，首先要喺門口集齊人腳。你五個人去幫襯，一定要肯定你五個人都喺度，先好行入去。萬一你入到去，同伙記講你未齊人但又想坐低，擔保你屎忽開花，然後畀人趕返出門口」。「嗰度啲伙記好賣力，全部好有效率。估計佢哋應該有花紅分，兼且分唔少。印象中見過幾個伙記戴勞力士，加上佢哋嗰副『客又點？阿叔唔捻使畀面你』嘅面口，令我深信佢哋每人都有幾棟樓收租，返工只系為咗打發時間，以免自己行咗去麻雀館」。如此生猛的描寫，幽默抵死針針見血，更啜核的竟然還在後頭：「澳牛嘅伙記除咗×鳩啲客，自己之間都會互×。有次去食嘢，短短十分鐘就畀我見到精彩嘅一幕：午飯時間，餐廳人山人海。有兩個伙記，好像因為安排乞兒入座嘅先後，互相系度嘈。我以為為咗啲客打交，是地產經紀才會做的。二人初則口角，繼而動武，好快已經扎行晒馬，推嚟推去（記住嗰陣系澳牛最繁忙的時間），附近嘅客都一邊咬住條多士，一邊左閃右避……」