耀才（1428）主席葉茂林早前以每股1.3元，向周大福配售1億股，同時向其發行認沽期權，周大福可於兩年內以1.63元沽貨，意味周大福穩賺不賠。大家可能會問，葉茂林即係擺明送錢畀純官使？牌面睇係，但如果摸清兩者背景，其實合作範圍無極限，五大賣點吸引到暈。
第一，葉茂林乃CY參選特首時金主之一，純官則半途出家做梁粉，兩人理念一致，夾！第二，海通國際（665）前身大福證券，屬新世界旗下，純官對證券業肯定熟過你同我，揀耀才做策略投資，必定有原因，正！第三，耀才喺業績報告透露，有興趣返內地設立合資，如今拍住純官，以其名氣及脈絡，要搶灘可謂易如反掌，讚！第四，本地證券行海通及國泰君安（1788）相繼發盈喜，耀才業績亦不失禮，截至去年9月底止中期賺7,239萬銀，按年增長1.3倍，相當於去年度盈利嘅78%，再發盈喜只係時間問題，掂！第五，葉茂林成功將夜場業務Magnum（2080）上市，更勇奪新一代超購王寶座，最厲害嘅係，Magnum上市之日，竟係港股見頂之時，如此靚位cap水走人，連運到贏埋，強！
耀才噚日一度跌穿1.3元，其後拗腰而上，收報1.35元，證明周大福入股價鐵底味濃，現價入場，點秤都值博。
唐牛