巴神同卡斯拿斯同樣做爸爸，你會揀邊個？
一向我行我素嘅AC米蘭前鋒巴洛迪利，日前終於解決「家庭糾紛」，與前女友拉費娜（ Raffaella Fico）前年12月生下嘅B女皮雅（Pia）相認。早前意大利球星一直未肯承認自己係經手人，更刻意疏遠二人，為此拉費娜去年向法院起訴巴神，應法院要求下，「壞孩子」不得不答應進行DNA檢驗。如今DNA結果揭曉，巴神第一時間就喺Twitter公佈喜訊：「終於真相大白！皮雅，我可愛嘅寶貝！我係你爸爸！」雖然巴神多咗個女難掩興奮，但就喺Twitter暗指拉費娜不時借佢嘅名氣博宣傳，分手鬧劇似乎長做長有。
負心男又未必做唔成好爸爸，巴神天生異稟，性格古怪，又經常出其不意嚇人一跳，雖然冇可能將巴神變成卡斯拿斯，但多咗個B女或者可以一改「腦殘」同「壞孩子」性格！文：呂晨