濠賭股一日洗倉，一日狂挾，完全任由大行報告擺佈。魏力睇咗好幾年研究報告，結論係：當幾乎所有大行都唱好一個板塊，九成九都將近「瓜柴」。以濠賭股為例，呢兩年中資股唔掂，基金揸到一手都係濠賭股，銀娛（027）、金沙（1928）保持高增長時，當然無問題。不過，天下無不散之筵席，去年基數咁高，今年又冇新賭場落成，阿爺繼續打貪，今年增長應會放緩，估值自然要相應下調。
呢個時間，大行要出貨，但鬥掟當然不行，邊個接貨？所以，一齊出報告唱好，托住個價先派。睇番報告論點，不外乎認為1月份增長放緩，係受農曆年因素影響，要睇埋今個月條數再判斷，顯然為換取時間減磅，所以博反彈，濠賭股已非首選。
回說大市，反彈軟弱無力，今日A股復市，美國國債上限期限又到，不明朗因素甚多，並非炒股票的理想時候，可說「中伏易、搵食難」，盡量趁反彈減磅揸現金，等市況好轉再衝，更為適當。
近排魏力忙搬屋，不時去日本城，貪款式多、價格相宜，但行過幾間，整體感覺似舊式雜貨舖，冇咗幾年前的整齊企理；服務員傾住電話收銀，購物體驗一般。不過，控股公司國際家居零售（1373）圖表頗有睇頭，淡市下昨大棍破頂，MACD快現雙牛，惟成交未配合，不妨等企穩3.75元再跟進。
魏力
http://www.facebook.com/2012jason