今年中西情人節同日，各珠寶品牌使出渾身解數，希望貴客留低銀紙，Samantha在銅鑼灣商場閒逛，晚上九時仍見丹麥珠寶品牌Pandora人頭湧湧，店中小妹忙到臉容扭曲，經理Doris真是要給點掌聲，手裏忙着仍保持優雅，相反同場其他首飾舖就拍晒烏蠅。
Pandora在2010年登陸本港，旋即令港女中晒毒，首先是標榜獨特性，各人可以串起屬於自己的故事，每粒charm都有自家名；價錢豐儉由人，幾百蚊至幾千蚊都埋到單，首飾盒以至紙袋不敷衍，走高檔路線。
更最重要是，金主畀得開心，話說情侶間十萬咁多個紀念日，每逢紀念日送粒charm夠晒大方得體。Samantha隔籬個強國女人真實示範，買到成條鏈都係珠，價錢都唔過萬，皆大歡喜。講到呢度，美女Elly冷冷地拋下一句：咁又點？咪又係泰國嘢（設廠）！
當然廉價勞工，否則又點能令業績幾級跳？Pandora上月發佈業績預告，全年營業額達到90億丹麥克朗（約127億港紙），按年增35%，講究手工都仲有67%毛利率，發達國家賣得唔錯，英國和澳洲的上季銷售增長逾20%，不過論最開心唔係買佢哋的首飾，而是買佢哋的股票，Pandora股價兩年半內升5倍！
Samantha
本欄逢周一、三、五刊出