踏入馬年，環球市場波動加劇，用「屋漏偏逢連夜雨」形容貼切不過。繼中國製造業響起警號後，美國周一公佈嘅製造業數據奇差，令市場擔心世界兩大經濟引擎一齊死火，加埋新興市場危機着火隨時燒後欄，道指禮拜一唔見三百幾點，今年累跌近7%，各地股市亦唔多掂。
資料顯示，截至禮拜三，全球股市今年已經蒸發2.967萬億美元市值，相等於23.1萬億港銀，以全球70億人口計，每人平均唔見3.3張金牛，夠交一年固網上網費。
綜合市場意見，普遍認同唔計新興市場，歐美股市近期插水，只不過係遲來的調整，舊年大升後嘅profit taking。不過，好淡大鱷就壁壘分明。金磚市場之父、高盛資產管理前主管奧尼爾就同摩根大通環球證券部阿頭Tom Lee都話冇有怕，建議伺機撈貨。末日博士麥嘉華就話個市要跌兩三成，最好跌夠四成等佢買。
美國製造業數據大走樣，除咗令股市遭殃，亦打亂咗滙市嘅主旋律，事關今年來，市場炒聯儲局續退市，美元走勢亮麗，就算新興市場有風吹草動，或者阿爺經濟轉差，避險需求下，美元走勢唔錯。之但係，美元得享呢個優勢，主要係建基於美國經濟向好嘅樂觀預期，即係如果呢個假設唔成立，將削弱美元作為避險貨幣嘅吸引力，啲錢勢必再分流到日圓、瑞郎或甚至歐元等替代品，令滙市形勢更加復雜，而聯儲局上周宣佈再縮減買債後，美滙指數冇乜升，多少反映呢個情況。
央行閂水閘 澳元翻生
環顧各主要貨幣，本周澳元肯定係主角，事關澳洲央行周二議息後，爆半冷暗示為期兩年嘅減息周期暫告終（本欄有幸言中），最令人意外嘅，係唔再講澳元偏貴，刺激澳元由87.3美仙嘅近三年低位急速反彈，噚日已經抽返上89.82美仙。
呢次對已連跌三個月嘅澳紙而言，絕對係一支強心針。由於澳元之前屢積大量淡倉，加上沽澳元要比高息好重皮，家陣澳洲央行話停減息兼唔嫌澳紙貴，而家冇乜理由繼續造淡。有專家根據之前嘅挾淡倉數據估計，澳元從低位最少可反彈5%，即係上返91美仙以上。
左睇右睇，除非中國爆大鑊，否則澳元短期料好硬淨。就算本欄一直推薦嘅紐元兌澳元交叉盤，在新西蘭央行下月可能加息前，短期估計都要迴避，有糊在手不妨食咗先。
其他貨幣方面，日圓近期最強勢，美元曾跌到100日圓邊，除咗避險因素，美國10年期國債孳息曾跌穿2.6厘，同日本國債嘅息差收窄，亦係回吐關鍵，喺日本4月調高消費稅前，應該喺101至103日圓上落。歐元受通縮威脅，但市場波動可能吸引資金流入，此消彼長下，應該都係上落市（歐洲央行噚日議息後有料到另計）。
奇兵
本欄逢周五刊登