高陽科技（818）食正網購、電貿以及移動支付嘅大趨勢，前途是無可限量，股價兼未點郁過，最抵買，strong buy！
高陽除透過百富環球（327）主打非現金電子支付終端機，集團主打瓣數之一，就係第三方支付服務。線上線下支付交易相關業務，高陽兼備晒，場內亦應只此一家，兼修成正果。
業績靚兼估值平
高陽亦啱啱發佈2013年度盈喜，話會扭虧轉盈，原因就正正因為支付解決方案錄得溢利。高陽2012年度，仲講緊虧蝕1.6億銀，而2013年上半年度虧損，即係話2013年下半年嘅增長，係好爆炸，但呢個只係開始。
翻查資料，高陽合作方係中移動（941），後邊中移動手機支付註冊用戶超過1億，而上年全年移動支付交易額，高達1,600億港銀。又據IDC預測，祖國2013到2020年，網購累計規模，將高達28萬億銀人仔。
成個picture好清晰，一則，家陣通過手機，網購、電貿、交水電煤，已經成為當代生活習慣，移動支付只會有增冇減。又高陽拍住嘅，係祖國移動通訊嘅大大佬，嚟緊日子，真係肥過肥仔水。
另一方面，高陽手頭淨現金高達8.5億銀，而對上兩年，又將無形資產大額撇減，撇得乾淨，去迎接靚仔業績。
喺咁好環境底下，估計高陽今、明年度純利3.2億及4.8億銀，明年度預測PE得13倍。場內同行，神州數字（8255）兩個月大升3.2倍，環亞智富（1390）升近70%。就算以等同純利增長假定，兩隻股預測PE 20倍樓上，高陽至抵，現價2.31元翻一番上到4.6元，仲未上返2010年6蚊嘅高位，PE亦先追貼到行家。
錢雋
細價股專家
本欄逢周二、五刊出