【銅鑼灣→黃泥涌】現年61歲嘅馮寶寶曾經歷一次婚姻失敗，86年同任職金融買賣嘅招再強離婚，但就失去兩個仔招啟宗同招啟正嘅撫養權，對佢嘅打擊都幾大，後來仲患上抑鬱症，有過自殺念頭。好彩一切雨過天青，馮寶寶信主後又遇上現任丈夫翁兆全，令佢人生重燃希望。
輪流拍照
近年馮寶寶復出積極工作，早前喺大會堂開咗一場「昨日今日明日馮寶寶爆趣音樂會」，當時未見家人捧場，但原來乖仔近日已來港同阿媽歡度新春。大前日傍晚6點幾，記者發現一身黑色打扮、戴咗十字架頸鏈嘅馮寶寶同兩個後生仔喺銅鑼灣利園門口，其中一個係經常跟馮寶寶出席活動嘅大仔招啟宗，另一個着黑色羽絨褸嘅男仔同馮寶寶好似樣，應該係佢細仔招啟正。馮寶寶見到商場入面有一棵大桃花顯得好雀躍，影完單人相後，又拉住啟宗及啟正輪流影合照，心情超靚。
之後三人由利園行返去黃泥涌道寓所，約15分鐘嘅路程，馮寶寶一直蹺實細仔啟宗臂彎。可能因為傍晚天氣有啲凍，大風吹時僅着單薄衣衫嘅馮寶寶感到陣陣寒意，惟有匿喺細仔身後，又摸摸佢隻手嚟取暖，大仔啟宗雖同兩人隔住一個身位，但三人邊行邊傾，家人關係相當融洽。
採訪、攝影﹕徐錦池、楊浩賢
