一向斯斯文文嘅林嘉欣，自從結婚做咗媽咪後，大部份時間都係全職湊女，間中先出席活動，近日佢應詹瑞文嘅邀請，同伍允龍一齊做有線飲食節目《為食情報局》嘅嘉賓。擺明節目係講食，但係詹sir扭到講性，難得靚媽嘉欣冇有怕，仲大方認老公性慾強。
聽歌調情
錄影時詹sir為搞氣氛不斷講有味笑話，當另一位主持黃芳雯指蠔普遍被視為壯陽食品時，詹sir話：「食蠔好有口感，一咬仲有汁射出嚟。」詹sir讚嘉欣老公性慾強，難得嘉欣唔介意仲舉起拇指讚老公：「好有能力！好掂！」詹sir問嘉欣有冇挑逗老公，嘉欣怕醜話：「我覺得聽首歌已經可以好投入，唔需要刻意挑逗。」
詹sir即場踢爆嘉欣特別鍾情高大猛男，嘉欣話：「係呀，我老公六呎高，好有吸引力，見到已流晒口水同鼻血。」詹sir同樣不斷以「嘉欣BB」（鍾嘉欣）嚟笑伍允龍，搞到佢緊張到標汗，俾人逼供後伍允龍都表明婚前盡量唔曳曳，果然配合女友係教徒嘅身份。
撰文：馮仁昭