朋友剛從美國度歲後回港，向海迪分享一個最impressed嘅流動支付經驗。話說當地有間佢經常幫襯嘅café，只要喺手機銀包中，設定該店為經常出沒店舖，之後每當佢踏進café，收銀機前嘅iPad就會自動detect到佢，每次點餐，收銀員只要在iPad上按鍵，就可連接佢嘅信用卡直接找數，整個過程連拎電話出來掃barcode都慳番。
呢個故事係想告訴大家，雖然阿里巴巴同騰訊（700），喺手機支付上鬥得如火如荼，但其實兩者仍處於初階發展水平，搞marketing花招多過應用突破。近日被馬雲形容如「珍珠港偷襲」嘅「微信紅包」，雖然能喺短時間內製造話題，吸引大量用戶綁卡，但消費者長遠會唔會使用你嘅支付服務，仍要取決於兩個最基本嘅因素：方便同安全，邊個可以畀到顧客更好嘅體驗先係最重要。
有內地零售商形容，現時微信同支付寶喺零售終端優勢完全唔同：微信用嚟發佈資訊、做customer service一流；但以支付嚟講，就仍以支付寶累積多年嘅經驗較優勝。兩者唯有鬥快惡補對方嘅長處，較快一方就可勝人一籌。
海迪