官非纏身嘅伯明翰環球（2309）大股東楊家誠，新年流流都幾躁底，噚日匆匆到尖沙嘴一間五星級酒店出席股東特別大會，離開時被大班傳媒包圍，爆出一句「畀條路人行吓啦」！
楊家誠涉及嘅案件本月底有裁決，佢前日突然辭去伯明翰主席同執董職位，咁啱公司噚日舉行股東特別大會。
楊家誠開會冇耐就起身走，不過佢條快閃路線唔多暢順，先係行入酒店電梯，閂唔到電梯門，無奈企喺電梯被傳媒任影十幾秒。出到酒店門口，佢見到自己架車，但見唔到司機，又被傳媒圍到實。
佢初初只係一臉無奈，顧住急召司機，冇答問題，後尾爆咗句「畀條路人行下啦」，不時拉車門手柄企圖上車，又東張西望等司機。佢越等越躁，就話大家「影夠未？影我做乜？」。
過咗三分鐘，司機先上氣唔接下氣趕到，即刻開車門畀老細跳上車。楊家誠上車後口噏噏，呢位司機應該被人開年了！
楊家誠走後，公司執董Peter Pannu透露，旗下球隊有多個潛在買家，大家唔使擔心咁話。但公司晚上宣佈執董潘岑唔撈。