上月澳門博彩收入按年僅得單位數增長，按月更倒退逾一成，消息令濠賭股跌到一仆一碌，龍頭銀娛（027）及金沙（1928）插水7%，令本已弱不禁風嘅恒指再添壓力。港股舊年埋單微升3%，其實全靠銀娛、金沙及騰訊（700）三隻股票撐起，如今濠賭雙雄長開N鋪大後，睇嚟有排開細，恒指恐怕都凶多吉少，下試二萬關絕不出奇。
大市易跌難升，將部份資金轉移至防守股乃上上之策，本欄上月底推介REITs置富（778），至今累升2%，相比恒指累跌5.3%，絕對係強到冇朋友。今日推介龍頭REITs領匯（823），避風能力更強。曾幾何時，資金喪買高息股，領匯頻創新高，但股息回報卻越見奀豬，最終在美國聯儲局放風退市嘅噩耗下，由歷史高位46.4元回落，以昨日收市價34.65元計，累積跌幅達25%。不過投資價值卻因此浮現，最新息率達4.5厘，以其壟斷地位，已經稱得上吸引。本報港聞版昨日提及，領匯翻新後向租戶狂加租四倍，雖然人情味欠奉，但從投資角度看，證明其加租能力有增無減。證監會亦正就REITs投資範圍擴大至投資物業發展及金融工具等進行諮詢，一旦成事，領匯嘅潛力可進一步爆發。睇圖表，領匯正下試9月低位33元水平，相當於股息率4.7厘，絕對值得入場揸中長線。
唐牛