聯想（992）自從公佈向Google收購Motorola後，要幫幅股價圖起題的話，可借用李白嗰句「飛流直下三千尺」。
今時今日，正如菲菲由上年已開始講，平價機先係王道。聯想上年已成為全球第五大智能手機品牌，但面對小米、酷派（2369）等掀手機減價戰，聯想要極速喺國際上打響名堂，除咗平之外，仲要有品牌。所以今次收購絕對唔奇，重點係29億美元值唔值。
過去微軟買Nokia，用咗72億美元；而盛傳聯想曾有意收購嘅黑莓，當時收購估值達47億美元，所以相對而言，今次好似唔算貴。至於Google前年買Motorola時，更係花125億美元。
表面睇好似聯想抵咗，但Google短炒Motorola明顯只係要專利，個品牌？佢根本視之為無物。Google前年入貨時，係連埋1.7萬個專利。之後中間經過多次拆售，考慮埋今次同聯想單刁賣走約2,000個，七除八扣，Google實際回收90幾億美元。換言之，Google用咗約35億美元就拎走1.5萬個專利。最值錢嘅包括電子刺青、防偽藥丸、Project Ara等創新項目，當然係非賣品。
就咁睇，數口最精嘅一定係Google；至於聯想主席楊元慶能否再施展奇技，將剩蔗變成黃金，要拭目以待。單刁公佈後，隻股市值已唔見255億港元，即係33億美金，咁你話係唔係貴啦？
Fifi
本欄逢周二、四刊出