特首梁振英（CY）上月中公佈施政報告，其中提到政府會研究成立民航訓練學院。據了解，民航處隨即跟進，農曆新年前搵齊航空業內各機構代表召開簡介會，可惜呢個簡介會冇具體嘢講，只係話政府會搵顧問公司做報告，至於搵緊邊幾間顧問公司，就冇可奉告。
唔少航空業內人士對於民航訓練學院嘅成立目的都一頭霧水，需知道最需要接受訓練嘅飛機師同空中服務員，𠵱家已經由國泰（293）、港龍等航空公司自行培訓，亦唔愁冇人排隊應徵。
僅交代聘顧問做報告
機場目前最缺乏嘅工作人員，屬於比較需要體力勞動嘅一類，例如搬運行李、推車、飛機維修等，唔少人就係嫌長途跋涉走去機場返工，扣埋交通費、出入時間唔化算，唔肯去做。業界暗地裏不禁質疑，政府成立民航訓練學院係咪對症下藥，又有冇需要專登花錢做顧問報告呢？為誰而做呢？
民航處代表喺會上向業界透露，計劃今年4、5月聘請顧問做報告，研究未來10至15年本港同國際航空業對人力需求嘅情況，邊類工種需要提供訓練，之後點樣提供培訓等等，預計年底有報告。
業界代表提出問題同質疑，包括唔相信一個機構可以訓練出航空業內多個工種嘅人員、資源分配、資金來源等等，民航處代表都只係話要等顧問研究報告出台先知，𠵱家冇特定方向。至於搵緊邊幾間顧問公司，民航處就話唔講得。
李華華
mailto:[email protected]