新年流流，邊個想同人開戰吖；若然真係要同人開年，都係被迫㗎啫！好似前傳媒人、堅實女梁粉屈穎妍咁，過年前寫咗篇題為〈筍工〉嘅文，話今時今日想hea做兼冇人炒，只要攞佔中同反梁做擋箭牌就得，更拖林慧思老師落水，話佢「放了幾個月病假白支薪水，就是一活例」。休假養病中嘅林慧思忍唔住反擊，喺《蘋果》網上論壇撰文，怒插女梁粉無的放矢，侮辱為佢診治嘅醫生！
林慧思喺題為〈咬着不放〉文中話，年初一讀完屈穎妍篇文後，難過到拜年前都忍唔住喺街上「呆呆地獨自流淚」，最嬲屈穎妍誣衊咗為佢睇症、斷定佢精神狀態不宜返工嘅醫生嘅專業判斷。
其實林老師自從上年7月喺旺角用粗口鬧過警察後，早就為當日言論公開致歉，但此後依然受到排山倒海嘅批鬥；與此同時女梁粉屈穎妍亦喺舊年8月開始，耐唔耐喺自己《明報》專欄放箭批評林慧思，執住林慧思講粗口唔放，話佢教壞小朋友；無論講路姆西抑或論筍工，都要抽一抽林老師水。
林慧思坦言面對不斷嘅滋擾同恐嚇，已患上抑鬱症，要服鎮靜劑先瞓得着，醫生亦認為佢暫時未適合返學教書，澄清絕對唔係詐病白𢭃人工，引述校方亦為佢着想，認為佢應喺醫生覺得適合時先復工，而佢亦有備課，為復工做好準備。林慧思強調自己「威武不能屈」，唔會被打敗；唔知女梁粉，唔會唔因此收筆？
mailto:[email protected]