【本報訊】娣姐的訓練導師葉師傅，指若果娣姐順利畢業，將是他13年教學生涯中「最令我驕傲嘅學生」。
「心態好好唔怕辛苦」
當初葉師傅知道班上有一位女學徒時，感到十分驚訝，「我從來冇教過女人（扎鐵）」，起初葉也懷疑娣姐是否能夠勝任，但很快就對她改觀，所有男生做到的她都做到了，「一般扎鐵技巧學得好好，𠵱家克服到體能，之後技術嘅嘢都難唔到佢」。
「娣姐有講過做體能好辛苦，但我一定唔可以優待佢，如果唔係第時出去做嘢就做唔掂！」葉師傅對娣姐的要求與男人無異，他認為女人體能比男人差，但卻豎起拇指讚她：「佢心態好好，唔怕辛苦，主動又肯學，呢樣係佢最大優點，亦解釋到佢點解成功！」
「男人喺地盤放工，返屋企可以嗌攰等食；但娣姐放工仲要買餸煮飯、做家務、照顧家庭，比男人仲辛苦」。娣姐的耐力令葉師傅折服。
葉師傅表示，行內從未出現過女扎鐵工，也對娣姐前途有憂慮，「但如果有判頭問我，我一定會大力推薦！」