新年假期結束，打工仔馬年第一日返工，最關心梗係嗰封開工利是，大唔大封呢？八方收到風，滙豐銀行私人銀行嘅職員，一早返工就喺枱面見到封大利是，梗係滿心歡喜拆利是，點知好多員工拆開後嚇親，事關裏面有兩條分別金色同銀色嘅魚仔形朱古力，同埋一句「龍馬精神」祝福句，莫非滙豐銀行咁慳皮，攞個意頭用年年有餘（魚）做利是就算？
滙豐發言人話唔評論；但消息人士講，其實嗰封只係「歡迎利是」而非「開工利是」，話私人銀行嘅高層，其實有同員工派利是，另外亦都有唔少人排隊入房恭喜吓啲高層，佢哋收到嘅全部利是都有錢㗎，希望大家唔好誤會滙豐好唔掂，其實只係一場美麗嘅誤會啫！論豪氣，滙豐拍馬都追唔上某大傳媒，今年開工利是竟然有1,000蚊，馬年肯定惟老闆馬首是瞻。