早有四位千金嘅公民黨陳家洛，早年同波蘭妻子生咗首位男丁陳道明。原來道明仲有三個月就滿兩歲嘞。家洛話呀，道明仔雖然年紀細細，但已經識將廣東話、英文及波蘭文混合嚟用，即係如果用波蘭文問道明仔問題，佢就會用廣東話回答，好鬼精靈。
家洛笑言，同道明仔呢種溝通方式好好玩，係「亂中有序」、「同家人溝通嘅法術」。至於四位千金，就趁新年整咗精美cupcakes畀家洛食，再陪老竇去公園「行大運」，難怪家洛忍唔住手喺facebook晒幸福，話今個新年真係甜在心頭。至於馬年願望，家洛就話最希望係多陪家人做運動、馬上普選咁話。