美聯（1200）今日舉行馬年傳媒新春團拜，好似仲會公佈人事新安排。聽聞，東南九龍及將軍澳區董事、人稱「AK姐」嘅郭玉滿更上一層樓，升任九龍區董事。AK噚日接受查詢時，只係話「公司一日未公佈，一切未作實」。
AK姐最為人所熟識就係佢喺2012年初，駕駛約值百萬元嘅奧迪（Audi）A7房車，載朋友到油麻地一間酒店消遣，交低架車畀泊車員，轉頭被人撞爛咗。據聞酒店方面已作六位數字嘅賠償。
其實AK姐十幾年前先至由秘書，轉去美聯做代理，由將軍澳區開始一直扶搖直上，期間已多次升職，上述嘅升職傳聞亦傳咗一年有多。
除咗佢，聽聞荃灣區董事歐沚軒將會接掌港島區，布少明升任住宅部行政總裁後，新界區董事職位一直懸空，有指將交棒予新界西北區董事張子存。