因租約期滿，按證公司上月20號「大寒」當日由中環國金二期，搬去上環中遠大廈，送蛇迎馬，佢哋就揀立春後，噚日大年初六下午，低調舉行入伙酒會，成個財金體系嘅高官都以按證公司董事身份現身。
出席嘉賓包括財爺曾俊華、財庫局局長陳家強、金管局總裁陳德霖、副總裁彭醒棠同余偉文，仲有運房局局長張炳良㖭，當然唔少得按證公司總裁李令翔（Raymond）主持大局。
新辦公室位於中遠大廈29樓同30樓，入伙酒會雖然冇請夏國璋醒獅，但儀式簡單而隆重，鬍鬚曾同陳德霖以按證公司正副主席身份，亮刀主持切燒豬儀式，旺一旺個場。
按證公司核心宗旨，係促進更多用家置業，兼幫助銀行提高資金穩定性，之不過雙辣招下樓市交投無起色，連用家都水盡鵝飛，睇怕按證公司要向銀行買樓按資產都唔容易，Raymond入伙後都要諗諗計嘞。