嚟緊18號就滿60歲嘅肥媽瑪利亞，去年11月因子宮生瘤接受手術後，噚日肥媽喺拉斯維加斯同老公Rick再度舉行婚禮。身穿低胸婚紗嘅肥媽同老公恩愛啜爆，兩人都感動到眼紅紅，有份出席觀禮嘅劉雅麗喺微博留言祝賀：「恭喜阿媽甜甜蜜蜜，幸福永遠！」
賭城行禮
其實肥媽夫婦99年已經喺加拿大舉行婚禮，當時計劃返香港補擺喜酒，但礙於肥媽母親病逝，故將婚宴取消，去年肥媽趁結婚14周年紀念喺佐敦搞婚宴，噚日喺拉斯維加斯就第二度行禮，馮仁昭打電話畀肥媽恭賀，佢好開心話：「因為老公驚我有事，叫我快啲做手術，冇事就再娶我。」
馮仁昭讚肥媽老公浪漫，肥媽話：「我唔死得嘛，佢咪再娶我囉，我由頭喊到落尾，老公都有少少喊，鼻哥紅晒，我諗佢後悔應承咗我，唔死得再娶我啩，哈哈！」
問肥媽𠵱家身體情況？佢話：「𠵱家好好，每三個月要驗，臨嚟之前醫生驗咗話血色素、白血球都好正常。」
撰文：馮仁昭
