香港電台向立法會工務委員會申請撥款60億元興建將軍澳新大樓，飽受立法會議員質疑，並被指責為大花筒，太奢侈，平時對港台不爽的民建聯、工聯會議員固然乘機設置撥款路障，即使是平時聲稱支持港台的民主派議員也因60億的數字太高，不敢大力支持，甚至加入反對行列。雖然蘇錦樑局長似乎極力為港台解釋，但最後宣佈撤回申請撥款，看來港台建新大樓之希望，凍過水。
港台現於廣播道，有兩塊地皮，一大一細，港台搬出後，政府可以將地皮拍賣，興建豪宅，隨時攞番六七十億，如果視地皮為港台物業，港台為一獨立公司嘅話，港台根本可以搬得好輕鬆，等同免費搬到將軍澳新大樓。可惜特區政府條數唔係咁計，係要分開嚟計嘅，甚至乎港台遷離廣播道後，會有議員建議在原址興建公屋㖭，廣播道居民可以組織定關注組，反對在港台原址興建公屋噃。
新大樓得唔到撥款，港台點算？咁就真係令人同情，到過港台之人，都知港台設施陳舊，樣樣嘢係幾十年貨色，與數碼廣播電台冇得比，但又要開始搞數碼廣播，識飛咩，特區政府長期對港台採取「陰乾政策」，現在立法會議員為建築費乘機向港台採取「揑死」行動，港台一定冇運行，受害嘅只係香港人。
點解咁講？最近有人反對「明報」換總編輯，以為明報係新聞自由象徵，簡直係大笑話。明報換總編輯，係張曉卿之事，與前僱員有甚麼關係，與讀者有甚麼關係？舉個例子，黎智英換蘋果總編輯，駛唔駛問過呂家明（前壹傳媒員工）或姜國元（前蘋果總編輯）呀？儍嘅咩！港台就唔同，因為港台編採部節目都有好多係公務員，廣播處長好難炒佢地魷魚，故此佢地搞編採獨立自主，有制度上的保障，有資格堅持，不受處長干擾，故此港台新聞部嘅公信力特高，最可靠。特區私人企業內，老闆話炒就炒，僱員那有甚麼真正編採自主呀？政府唔滿意港台言論，但又炒唔到啲主要公僕僱員，於是慢性陰乾之，泛民議員唔明白，加入做幫兇，不支持興建新大樓，眼光認真短淺。