常識題：當飛機上的兩個引擎，其中一個失靈冒煙，結果會點？理論上，得番一個引擎，應該仲可飛多陣，但架機會好chok；再過多陣，另一引擎負荷過重，死埋火，架機好彩的話可緊急降落，否則後果不堪設想。
股市兩大引擎──濠賭及科網股，前者昨冒黑煙，科網龍頭騰訊（700）亦疲態畢露，唔頂得幾耐，持有呢兩個板塊的戰友，係時候準備逃生。此外，環保、彩票股獲利沽壓龐大，隨時殺個措手不及。
昨推介龍傑智能卡（8210）逆市曾漲兩成，今日介紹多隻冷門股──開達集團（180），睇吓能否逆市突圍！去年12月，開達進行「七供三」，每股0.38元，較上日收市折讓22%，集資1.08億元作還債及營運資金。首先，單數供股將造成大量碎股，以持有1萬股計，即要供4,285股，散戶怕麻煩，唔少會揀沽貨唔供，讓大戶趁機收集，形成貨源歸邊。
再睇供股結果，有170份申請超額供股，合共2.05億股；當中，有1份申請超供8,000萬股以上，獲分配1,970萬股，涉近750萬元，佔總超供股數45%，絕非一般散戶所為。顯然，供股主要目的為收乾貨源，結果係點？過去三日，開達逆市爆升三成，昨收0.53元，雞仔注博一鋪，短期目標0.76元；中線如能重上資產值1.94元，水位2.7倍。
魏力
http://www.facebook.com/2012jason