港視（1137）發牌事件所引發之政治危機及其後果，正逐步浮現，切片化驗，可見梁氏政府管治手段，已走入魔道。最新一單乃當日篤爆政府扭曲顧問報告之顧問伍珮瑩「被辭職」，蘇錦樑公開表示冇向該顧問公司施壓未必作假，只是施壓者可能另有其人。
梁振英運用政治手段作秋後算賬，已經寫在牆上。首先是商台李慧玲調走朝早黃金時段，清除批評梁振英最有力炮台。而《明報》調走總編輯劉進圖一事中，揭出當時遠在加拿大嘅呂家明打電話畀劉進圖，「關注」《明報》點解連續咁多日將「港視發牌」放上頭版？而此後明報集團就決定空降一位南洋人出掌該報。
梁振英越報復越孤獨
跟手就發生一連串以抽廣告方式對付唔肯歸邊，在港視發牌事件中同政府唱反調之《am730》及《蘋果日報》，對付《am730》是直接抽走廣告，對付《蘋果》則以政治杯葛手段逼渣打銀行等就範，停止在《蘋果》賣廣告。其間仲有一單，就係迫令所有原本已應承出席自由黨黨慶之司局級官員，不得出席該活動。當然還有上京述職時篤自由黨田北俊背脊。
港視發牌係梁振英全力出擊、睚眥必報，報復打擊政黨及傳媒嘅示範，但呢種手段未必得到北京友支持，因此才有王光亞要特首述職找到不足此說法，同時亦不獲政府高層認同，林鄭在政改諮詢照樣engage泛民，曾俊華則公開與施政報告派福利唱反調。梁越採取「兇」人手段，就令自己陷入孤立境地，因為佢根本無足夠基礎搞政治鬥爭，進行政治報復。
北京當前急務並非要激化香港內部矛盾，而是要爭取中間溫和路線支持談判2017政改，林鄭就是真正代表，但梁連自由黨也搞，即表示仍視唐營為政敵，要除之後快。田北俊在《蘋果》訪問中表示要接受基本法框架傾政制，施永青被抽廣告後表示支持民主黨政制立場，呢樣先至係北京要求。梁大搞矛盾擴大化，用左方式處理特區政治，後果是拖政改後腳。
政府官員日日都要問立法會乞票，向傳媒推銷政策，建立友好關係網，但背後個老細就四方樹敵，八面威風，你話班司局長及AO會點諗，見到香港走上極端政治之路，夠鐘就立即入紙退休走人，而楊立門、區璟智就係當中表表者。
梁振英全方位搞政治鬥爭，報復港視發牌一役嘅政敵，表面上好似好有型，好有power，但其實四處點火，令香港政局繼續爛落去，豈是北京所樂見？
添馬男