領隊勞特立敵唔過英聯盃魔咒，禮拜二俾英超球會史雲斯炒魷魚，結束佢喺威爾斯嘅18個月之旅。但應該好快有人陪佢，事關富咸同日喺英足盃第4圈重賽輸咗俾英甲下游嘅錫菲聯後，睇怕佢哋領隊梅倫史甸都過唔到今個禮拜喇！
加時負甲組仔冇仇報
富咸家陣喺英超雖然包尾，但禮拜二嘅英足盃第4圈重賽對手只係喺英甲排尾2嘅錫菲聯，而且有主場之利，斷估唔會衰啩。點知佢哋真係「瀨嘢」，法定時間踢成0:0，之後喺加時仲黑到最後一刻俾客軍嘅後備沙蘊米拿隊爆，最終慘輸0:1出局。
梅倫史甸賽後被問呢場係咪接手後，表現最差嘅一仗，佢話：「肯定係。你會見到我哋隊波真係冇晒信心。」富咸上半季打得唔好，於是佢哋喺舊年12月2號委任原本做主教練嘅梅倫史甸，接替被炒嘅祖爾做領隊，諗住搵佢救亡。點知隊波仲衰過由祖爾領軍嗰陣時，唔止喺聯賽包尾，仲要喺英足盃出埋局。
消息話，富咸班高層對梅倫史甸冇晒信心，計劃喺兩個月內第2次換帥，搵第3個領隊救亡；據報佢哋已有人選，就係之前教過查爾頓同韋斯咸、家陣喺小屋球場做緊技術總監嘅古比士利。梅倫史甸喺多間博彩公司都係下個被炒領隊嘅大熱門（見附表），睇怕佢好快玩完，成為繼勞特立後，喺呢個禮拜內第二個俾人炒魷嘅英超領隊。
史雲斯今季越踢越差，餘下時間隨時要打護級戰，所以佢哋亦喺禮拜二炒咗領隊勞特立，由後衞蒙克同埋教練阿倫居迪斯暫時掌管球隊。聽講史雲斯對多個星級教頭都有興趣，包括伯金、比爾沙同荷杜。勞特立前年夏天先至加盟，一嚟到就幫史雲斯攞到英聯盃同英超第9名，但隊波今季走晒樣，早排仲發生球員打鬥事件，最終勞特立亦俾球會攞咗嚟祭旗。雖然佢冇咗份工，不過由於仲有一年半合約，估計史雲斯會賠番150萬鎊畀佢。
勞特立中英聯盃魔咒
話時話，原來自06年開始，淨係得費格遜贏咗英聯盃後唔使死，其他如摩連奴（車路士）、拉莫斯（熱刺）、麥利殊（伯明翰）、杜格利殊（利物浦）同勞特立（史雲斯）都食咗無情雞。唔通個英聯盃真係咁邪？睇嚟打入今屆決賽嘅兩位領隊，包括曼城嘅比歷連尼同新特蘭嘅普耶都要小心啲嘞！