舊年宣佈出櫃嘅男歌手吳彤，近日有人出價8萬蚊一晚同5個人一齊玩6P。馮仁昭噚日打電話向吳彤求證，佢話半年前有個人透過facebook同佢聯絡，初時話鍾意聽佢啲歌，之後就撩開房，吳彤話：「佢話有幾個friend想同我過一晚，我拒絕咗，嗰陣時未講價錢，靜咗一排，近呢兩、三日又忽然傳訊息嚟話8萬蚊囉，我一直冇回佢，當佢惡作劇，如果佢一直（騷擾）落去，我咪喺facebook舉報佢。」
正職做PR
吳彤話睇個名係男性嚟，都係第一次遇呢啲事：「同朋友傾開，都有其他朋友俾呢個人問過（價），所以叫大家小心啲。」
舊年有報道話白健恩涉嫌喺天水圍兜客，事後佢否認有不道德交易，有傳今次搵吳彤嘅人，疑似聯絡白健恩個中間人，吳彤話：「冇同白先生傾過，唔評論啦！我覺得嗰個人真係好儍，佢喺facebook用手提電話傳訊息過嚟嗰陣，睇到佢喺天水圍send。我啲friend之後笑我，問我究竟幾多錢，我話係無價寶，亦都係零機價。我自尊心太強，唔會做呢啲。」
吳彤話呢兩年有份正職係做PR，絕對係正經嗰種。至於白健恩噚日就發新年相，祝大家大吉大利。
撰文：馮仁昭
