我求大俠喺唔順嗰陣，有時都會去拜神求轉運，估唔到朗尼都會咁做，但佢就唔係去搵黃大仙，而係求上帝打救。上周六曼聯喺英超作客輸畀史篤城1:2，嗰晚佢就睇GODTV（上帝電視）睇到深夜2點，仲要貼埋上Twitter，點知俾球迷寸，搞到佢即刻刪咗篇「求神論」。
網友：簽上帝返嚟啦
曼聯上周六強陣訪史篤城，尹佩斯、朗尼同桑馬達都正選，點知輸1:2，錄得今季第8場聯賽敗仗。家陣佢哋少榜首嘅阿仙奴15分，比第4嘅利物浦都差7分，冠軍肯定唔使諗，入前4都窄窄哋。喺呢個咁無助嘅時候，朗尼決定向上帝求助，輸波後睇GODTV，仲要睇到深夜兩點。佢喺Twitter度寫：「GODTV，我睇緊祢同感受到祢，俾祢嘅愛包圍住。」之前承認會喺賽前祈禱嘅朗尼，一話自己搵上帝打救，敵對球迷即群起而寸之。
網友Tino Cappuccino回應：「你隊波想入前4，睇嚟連上帝都幫唔到你哋。」另一個網友咁講：「朗尼冇嘢呀嘛？深夜兩點喺Twitter話自己睇GODTV，係咪因為莫耶斯屎得滯，搞到佢要轉軚信上帝。」就連紅魔粉絲都忍唔住抽佢水：「好明顯我哋要喺夏天簽上帝返嚟！」朗尼見勢色唔對，隨即喺禮拜日清晨時份刪咗佢篇「求神論」。
曼聯就冇搵上帝打救，自己諗咗啲橋出嚟同粉絲拉近距離，趁機轉移視線，點知搞到一鑊粥。話說佢哋幫中場卡域克開咗個Twitter，等佢可以回答粉絲嘅問題。誰不知班球迷問得鬼咁尖銳，吓吓針對湯卡華利之餘，亦搞到佢唔知點答。例如有人問佢，如果佢要將湯卡踢出曼聯，會點同佢講？另外有人問佢之前同C朗、史高斯等球星合作，家陣就變咗同湯卡、拿尼之流一齊踢，究竟有咩感覺？
安達臣爆紅魔現逃亡潮
此外，上個月俾曼聯借去費倫天拿嘅路爾斯安達臣，向ESPN爆紅魔大鑊，話成班球員都想走，包括被球迷視為瘀血嘅拿尼。但之後佢死口話自己冇講過。我求大俠只能嘆一句，果然係國之將亡，必有妖孽！