被內地傳媒封為「香港Adele」嘅張潔瑩（Kit），喺《中國達人秀》演唱Adele名曲《Rolling in the deep》一鳴驚人；最新一集《中國達人秀》複賽啱啱出街，阿Kit意外被踢出局，無緣晉身十強決賽。
點解阿Kit當晚演唱齊秦《我拿甚麼愛妳》表現失準？原來佢喺台上聽唔到鋼琴配樂；節目錄影完畢後，導演都同佢講，台下都一樣冇咗聲，但為免俾人話自己「賴地硬」，惟有話喉嚨乾失準就算。當晚評判都話呀，雖然阿Kit未能晉身，但已經喺網上熱爆。如果觀眾想阿Kit代表香港重返決賽，可以喺微信投票，事關獲觀眾投票最多嘅選手可以「復活」重返決賽。