狼班子跳船潮，席捲禮賓府家傭？話說八方發現政府喺上月底開始，公開招聘一名特首辦二級家務員，月薪$22,165，條件係要有至少九年喺大戶人家、大型飲食機構或者酒店做中廚嘅經驗，必須精通中菜烹飪。
呢份三年嘅合約工，除咗服侍特首一家，亦要喺官邸、粉嶺別墅同其他地方舉行嘅官式同社交宴會提供餐飲服務。呢個空缺嘅截止申請日期係今個月17日。
係咪狼振英太重口味，入主禮賓府唔夠兩年，搞到連家傭都頂佢唔順要走人呀？特首辦回應時強調，今次唔係額外增加人手，只係因為有個二級家務員去年底離任，所以要填補空缺啫。
至於本身個二級家務員係唔係年老退休？特首辦話就唔方便透露嘞。如果成功請到家務員，管家連一至五級家務員一共有成24個人，佢哋需要輪班工作。
2012年請過五級家務員
其實禮賓府有家傭唔做，已經唔係第一次，八方睇番資料，發現狼振英2012年10月入主禮賓府後，政府曾經刊登過廣告，為特首辦招聘五級家務員，獲聘者月薪約$12,000至$15,000，當時特首辦話，係因為有個家務員會喺當年年底退休，所以要請人頂替咁話。有網民話幫狼英打工咁惡頂，人工有22萬先會考慮。