財庫局局長陳家強噚日早上去交易所開市，新官上任一個月嘅副局長劉怡翔就去金銀貿易場開市。劉怡翔退休前係按揭證券公司總裁，照理見慣大場面，但見佢噚日表現好似幾緊張，大約只有三分鐘嘅講辭都要睇住貓紙讀，仲要完場即閃，冇接受採訪，唔通佢退休一年重返官場，仲未熱身？
劉怡翔嘅講辭其實冇乜特別，都係話蛇年外圍波動，香港金融市場都可以穩步發展，希望今年更好。最特別係金銀貿易場理事長張德熙致辭時，話希望前海能盡快成立黃金交易中心，劉怡翔竟然相當謙虛咁話「聽從理事長吩咐」，將為前海努力工作，唔知張德熙有冇受寵若驚。
金銀貿易場今年又搞新意思，搵來一班小學生出席開市儀式，事關金銀貿易場早前贊助東華三院嘅小學，參加繪畫比賽，得獎嘅小學生獲劉怡翔頒發嘉許狀，為開市儀式添生氣。