娛樂大亨林建岳旗下嘅麗新國際（191）疑似有家族股權轉讓。港交所（388）資料顯示，岳少母親余寶珠上月27號嘅持股量忽然由30%，大幅降至0.25%。余寶珠透過一間名為Wisdoman嘅公司持有呢批股份，咁啱呢間公司舊年底新增股本，又委任岳少阿仔林孝賢做董事，似係家族內部有動作。
Wisdoman一直由岳少與88歲嘅母親余寶珠做董事，各持一半權益，上月中仍然持有麗國30%股權，而麗國就控有整個麗新系。
港交所「披露權益」呢欄新近只係見到余寶珠喺麗國嘅持股量降至不足1%，未見呢批股權轉咗去邊。都話港交所披露權益呢一欄最唔夠透明度，總係睇到人一頭霧水，要等大股東作進一步披露。查實，近年好多本地家族企業陸續分家產，余寶珠將麗國股份轉畀阿仔或孫仔都唔出奇。