球賽有MVP（最有價值球員），銀行界都有MVB。顧問機構Brand Finance新近公佈全球最有價值銀行品牌排行榜，滙控（005）今年升一級，取代摩通進佔第二名。中資行亦唔弱，工行（1398）、建行（939）、農行（1288）躋身十大。
Brand Finance以企業願意為銀行品牌付出嘅金額，計算品牌價值，列出500大。滙控今年升呢，品牌價值269億美元，係唯一進佔頭五名嘅歐洲銀行。第一名繼續由股神畢菲特嘅愛股富國銀行蟬聯，品牌價值302億美元。工行、建行、農行三間中資行就齊齊升一級，分別排第六、第九同第十，係亞洲銀行中排名最高嘅，農行仲係首次入十大。