作為《蘋果》讀者又係作者，望吓同行寫乜係種感應活動！周日見股榮話全世界做咗低頭派，確係悲喜交集嘅事。悲者，人與人距離拉近咗，但係又少咗真實交往中嗰種樂趣。喜嘅，係網絡經濟2.0無論你like唔like，都係一個唔可以改變嘅事實！就好似電腦時代由dos制式走向視窗，你唔跟，潮流會將你歸邊，即係淘汰你。
十年前科網年代，係由實轉虛，即係公司搞個網站，整個「.com」股價就爆升，但飛天又唔能落地，最終只會跌死！最緊要係當其時技術可能ok，但消費者未適應，唔ok！故產生唔到新嘅引爆點。
「雙馬」將互聯網融入生活
十年後今日，「雙馬」公司成功將互聯網融入生活，加上智能手機、社群效應，呢啲以消費者生活模式做主導嘅「軟硬天師」推出，將我哋對網絡嘅軟天師即係Apps，同硬天師即係手機、iPad、Tablet等，令我哋更feel到冇咗佢哋真係好唔得，到外地只要有wifi就可以同世界連接，地球好似變咗大平原般，迷途唔緊要，有google map！
網絡世界係真定假唔重要，最緊要而家「雙馬」將「虛加實」，令公司可以落地，物流、金融、支付，所有同科網價值鏈可以結合，同有「N稿」嘅嘢都可以行落去！今次係為企業透過互聯網創造競爭優勢，目標闊好多，個故事又會動聽好多！作為科技達人，Prof J相信資訊科技以創意性破壞（creative destructive）去改變世界，呢個名詞，係2000年Prof J教書已經講到口乾，大家都覺得無相干，但時代巨輪繼續向前，作為21世紀生存嘅你同我，你又會點樣為企業從中搵一個藍海，去為一個不預知嘅將來努力？答案，咪繼續睇我寫嘅文囉！哈！
徐燦傑
中國銀河國際財富管理主管
本欄逢周三刊出