民生派（民建聯加工聯會加泛民）議員在立法會佔大多數議席，對於政府派糖派錢及福利政策，從來支持，至於最後由誰人付鈔，民生派議員就唔會考慮咁多咯。過年前，老友T就哀嘆佢地呢類中小企老闆任人宰割，無議員代佢地發聲，佢話：「民生派議員視我地如肥鵝，佢地口口聲聲話保護消費者，打壓大財團，為打工仔出聲，於是爭取到最低工資、競爭法、商品條例說明，依家又講標準工時、取消強積金對沖，其實呢啲法例於大財團絲毫無損，佢地有錢，執笠機會好低，又有律師團隊，有內部人才來應付呢啲條例，一定唔會犯法，新增加嘅支出，你地叫做乜嘢話，合規支出吖嘛，只係佔大財團嘅收入嘅一個微小部份。我地就慘啦，邊度有資格請定律師或者成立一個合規部呀，樣樣都係錢，我嘅營運成本一直有增無減，但又冇調升收費嘅能力，你叫我點搞？啲經民聯、自由黨、商界功能組別議員只係為大財團服務嘅，完全唔睬我地中小企嘅意見，呢班議員冚扮爛係廢物，XYZ……」
講得咁嬲，老友T自有因由，因為佢愈來愈難請到夥計，不少員工已轉去做保安看更，唔肯為佢間公司一日擔抬八至十小時，如果照陳婉嫻等議員嘅講法，你咪加人工福利留住啲工人囉。鬼唔知阿媽係女人，收入不能增加，那可調高工人薪水呀？還有MPF、勞保費呢，未做過中小企老闆者，就不明白其中苦況。
老友T指出一個最低工資法，已經搞到全港勞工服務結構發生了質變，六十歲以上嘅工人成為犧牲對象，好難搵工，坐在公屋屋邨百無聊賴，好彩現在失業率低（3.2%，拜自由行之賜，冇咗自由行，失業率必然上升，提出限制內地遊客來港之人，唔該首先研究吓呢個問題），就業不是一個政治議題，他日若有改變，社會穩定可以迅速變壞，特區政府有排煩。
﹝後記：與老友T談話後，睇到一篇報導，議員范國威做「老闆」，拖欠助理薪水，被小額薪酬索償仲裁處裁定須繳付有關欠薪及訴訟費，可見得議員可以開口埋口講打工仔福利，但自己就唔知道執行有困難呢！﹞