好打得嘅林鄭月娥，爽朗短髮look深入民心，但查實佢就讀香港大學嘅少女時代，都有長髮純情時；而且衣着都幾潮，佢喺畢業前一年北上內地交流，都潮着長boots周圍走，非常搶眼，但據聞當時都冇乜狂蜂浪蝶，唔通係性格太硬淨，令男士唔敢埋身？
高達讚靚 單雞話「普通」
話說林鄭1980年港大社會科學學士畢業前，曾經參加港大學生會1979年搞嘅清華交流團；當年負責面試團員嘅就有當時身為副團長、現時冇回鄉證返大陸嘅民主黨李永達。高達話呀，林鄭當年係以社會科學會秘書長名義申請隨團訪問大陸，憶述當時未「面試」前已經一心批佢參加，皆因林鄭當時喺港大社科院已經好出名，負責搞「香港周」，亦幫手搞扶貧調查，喺社運圈雖然冇參與任何組織，但都算活躍，「當時已經好多人讚佢叻」。
高達話呀，由於當年搞學生活動嘅都以男人為主，林鄭身為少數女將自然好突出，仲話：「當年搞得社會運動嘅，都係靚女」，憶述那些年嘅長髮林鄭不時紮孖辮返學。
當年都有隨團北上交流嘅單仲偕憶述，1976年四人幫倒台後，學生會覺得需要重新認識中國，所以搞咗交流團；由於林鄭當時高班過佢，所以唔太熟呢位師姐，只覺得佢當時個樣普普通通、不時着boots返學。
不過，有AO就話呀，當年港英政府對投考政務官嘅天之驕子check得好緊；林鄭畢業前有咁熱愛祖國嘅舉動，竟然都可以考到AO，都算係政圈嘅異數。
mailto:[email protected]
