環球股市四處火頭，拖累港股馬年紅盤脫腳，一口氣喪跌637點，執筆之時，日圓升見101水平，拆倉之旅尚有一段路要行，始終美股舊年升得多，獲利回吐正常不過，恒指睇嚟要繼續捱打。
早排新地（016）郭氏家族分身家有突破性進展，大佬郭炳湘終於同兩個細佬三分天下，各得三分之一新地股份，佢同時間辭任新地、新意網（8008）及載通（062）非執董職務。市場預計郭炳湘會大展拳腳，隨即尋找相關概念股，例如與郭炳湘私人有合作嘅麗新系，便曾經獲資金追捧，不過，要唐牛揀郭炳湘概念股，新意網乃不二之選！
新意網最新市值達64億銀，喺創業板嚟講絕對數一數二，集團主營數據中心及資訊科技設施，乃現時科網潮下最炙手可熱嘅業務之一，何解依然會喺創業板掛牌呢？其實前年新意網曾經提出轉板，有傳因郭炳湘拒絕簽署同意書，終令行動擱置。如今郭炳湘離開，新意網的營運只會更加暢順，絕對值得加分。
新意網最新公佈首季業績，盈利按年增長24%，毛利率更躍升6個百分點至63%，兩個字講晒︰靚絕！手頭現金加證券總值17.1億銀，相當於市值近三成，財務狀況上佳。噚日逆市炒高8.2%，成功破旗，無論從基本因素或技術因素出發，都肯定博得過。
唐牛