馬年開市，港交所（388）主席周松崗與CEO李小加按慣例，噚日晨早到交易大堂向出市代表派利是，雖然唔少出市代表攞到500、1,000蚊大利是，但個別慨嘆，交易大堂越來越冷清，由九十年代高峯期過千人，到𠵱家只得50幾人。隨住系統提升，交易大堂嘅存在價值亦越來越低，開市派利是嘅熱鬧情景隨時成絕響。
港交所準備好十封1,000元、廿封500元同大量50元利是派畀出市代表，人數少，抽中大利是嘅機會自然增加。
交易櫃位僅餘200個
出市代表張小姐收到500元利是，心情大好，佢喺交易大堂工作超過20年，留意到港交所呢兩年嘅利是重手咗，可惜大堂氣氛就一年比一年悶。佢認為，今年係最靜嘅一年，「以前1,000人都見過，𠵱家得番50人，完全係兩回事。」佢聽聞唔少證券行唔打算再租交易櫃枱，擔心明年交易大堂唔再存在。
不過潮流真係好難逆轉。根據資料，交易大堂1986年啟用，所有交易都喺度進行，1993年高峯期一度逼爆1,400名出市代表，1996年出現場外終端機後，越來越多證券行棄用交易大堂。交易大堂2006年大裝修後，交易櫃枱總數由900個，銳減至300個，亦由方形改為圓形，舊年裝修再減至200個。舊年主板股份嘅場內交易（喺交易大堂進行）只佔總成交額約0.23%，跟千禧年近兩成完全冇得比。
交易大堂嘅櫃位𠵱家月租超過7,000元，近年證券行喊住縮減成本，呢筆費用遲早要慳埋。另一方面，交易大堂今年10月租約期滿，雖然話交易大堂嘅業主係政府，續租都未必大幅加租，但港交所都要考慮點樣善用地方，唔通繼續放200個交易櫃位曬燈咩？
李華華
mailto:[email protected]
