阿仙奴後防支柱梅迪薩卡一向愛低調，但其6呎6吋身高令人難以忽視，日前德國人被拍到同手球隊太太奧妮克絲坦治喺北倫敦散步，本來相貌平平嘅梅迪薩卡，身穿一身包到冚嘅深藍色運動套裝，星味欠奉，唔講真係難以發現係阿仙奴球星。
唔知係咪受到另一半影響，抑或大多數女運動員都豪爽兼不拘小節，連太太絲坦治都有別於一般球星女伴，不施脂粉就踏出家門，其勇氣相信並非一般WAGs所有！二人不但齊齊以「米芝蓮」情侶裝示人，仲不敵寒風拉晒拉鏈戴晒帽。雖然隨性同「呢啡」只係一線之差，但試問又有幾多對球星伉儷做得到？
呢種簡單隨性嘅小幸福，比起被拍到出入ball場、跑車代步嘅球星更令球迷想掌聲鼓勵。有人話搵到個肯陪你捱麥記嘅女人好難，我就話搵到個肯喺嚴冬晨早，同你素顏兼着到成個「米芝蓮」咁一齊散步嘅女人更難。
文：呂晨
以女性角度看球星新聞，唔用眉筆用原子筆寫低球壇百態！