馬年首個專欄，祝讀者股運亨通，馬上發達！馬年首個交易日，恒指挫逾600點脫腳收市，逾千隻股要跌，好在部份股份好似隱形彩票股看通（1059）、電子商貿股貿易通（536）終順利破頂，Samantha相當安慰。劣市下仍有36隻股份曾創52周新高，越唔起眼的殘股，越易來個大翻身。刨花板（蔗渣板）生產商鴻偉亞洲（8191）昨終谷底反彈，升兩成收市。
觸發強勁升勢相信同政府扶持有關，環保署今年全港設50個收集站，回收棄置的桃花，呢批桃花將全數運往廢木回收商香港鴻偉人造板，即係直接送原料畀鴻偉使，據報道，本港每日有380噸廢木棄置在堆填區，只有小量運往回收商，堆填區爆滿近在眉睫，相信政府利好政策將陸續推出，加上鴻偉擁有技術，所生產蔗渣板符合國際認證要求，拓展海外市場具競爭優勢。
另一方面，鴻偉能夠將業務發揚光大，是市場逐漸接受蔗渣板，好似宜家一個蔗渣板衣櫃盛惠5,000蚊，都大把人買，強國對抵食夾大件的蔗渣板需求甚殷，木傢俬銷售年均增長率達20%，為應付內地需要，鴻偉的新生產線去年尾投產，提高產能之餘，亦提高毛利，有助改善盈利表現。
鴻偉現股價仍較配售價低近三成，升浪應不會就此斷纜。
Samantha
本欄逢周一、三、五刊出