港股馬年出師不利，由頭跌到尾，成交更達757億銀，強勢股騰訊（700）怒掟33蚊；銀娛（027）亦插逾6%，是明確的走資訊號。不過，基金要搵食，沽大價股保本後，總要拎小部份資金出來，掃中細價股博一鋪。本欄上日推介酷派（2369）食正4G熱，逆市漲5.7%，報4.43元，高盛昨將其列入「確信買入名單」，目標價5.2元，可作為食糊目標。
此外，創業板繼續炒鑊甘，廿大升幅股份中，起碼升逾6%，當中支付股龍傑智能卡（8210）業績大躍進、估值極吸引、概念又當炒，上月至今累升1.5倍，但只係去番較合理價，潛力仲有幾大？比較一下彩星玩具（869）、CEC國際（759）幅圖，雖不中亦不遠矣。
龍傑智能卡為亞太區最大、全球第三大連機智能卡讀寫器生產商，曾獲《福布斯》選為亞太區中小企200強，但炒到今日，市值都係5.4億銀，扣埋殼價，業務只值2、3億，計落已知不合理。截至9月底止第三季，純利842萬，按年增長1.1倍，按季爆升85%，業績騰飛在眼前。
當上季賺900萬，全年純利2,631萬，按年勁增56%，夠發盈喜有凸。20倍PE，買到盈利年增五成的當炒股，根本冇拒絕的理由，如今資金聚焦此股，絕對有機會炒至10億市值，幅圖已呈破頂格局，目標價3.5元。
魏力
http://www.facebook.com/2012jason