今日係馬年第一個交易日，先祝各位馬年一本萬利，豬籠入水。每年拜年時，分析員或財經記者，只要一曝露身份，親戚就會問一連串問題。熱門問題榜首一定係問冧把！非正式統計發現，多數行家呢個時候都會講盈富基金（2800），有創意啲嘅就會答買facebook。遇到唔識do嘅親戚會駁咀：「你實好多貼士啦，唔好hea我啦。」唔係話想hea你，但假如認真畀冧把，贏咗錢就怕你日日搵我，貼唔中又怕親戚都冇得做。
「XXX買唔買得？」查實不論分析員或財記都有分工，唔係你講邊隻股票我哋都可以將個年報倒背如流。既然閣下已做足功課，就應該信自己。然後我哋聽完後就會講：「都ok呀！小心啲玩啦！」
「有冇見過李嘉誠？」呢條問題亦係經常要應付，證明唔少人覺得見過超人係一種福氣。即係咁，見過又點？可以當飯食嗎？
「點解你未發達？」、「係咪好易嫁到有錢人？」呢兩條問題係由財記Vivian親戚提出。即係咁，如果我知答案就唔會做緊記者，然後激發起閣下問呢兩條霍金都唔識答嘅問題。新年流流，講呢啲。
「嗰個講股嘅，姓孫嘅鬍鬚佬有幾肥？」雖然唔明點解菲菲嘅親戚對柏文bb咁好奇，不過呢條問題相對易答。菲菲當時上網搵咗張孫柏文近照，好等佢哋知佢已經冇留鬍兼瘦身成功好耐。
Fifi
本欄逢周二、四刊出