中門大開:廣東話政治 - 添馬男

中門大開:廣東話政治 - 添馬男

教育局網站一篇「語文學習支援」文章,指廣東話乃非法定語言及中國方言,睇怕又會繼浸會大學一本騎呢國教手冊之後,引起另一場捍衞本土文化運動。教育局班友,點會有足夠政治警覺性去處理呢類問題,只會越解越衰。
政府一直用「兩文三語」作官方語文政策,即承認廣東話地位,而香港亦成為中國領土內,有自己一套官方口語的地方,上海人一樣用上海話,但官方口語係普通話,唔容許有上海話廣播電台、電視,正因為上海話冇官方地位。在強國崛起,帝國重現陰影之下,廣東話變成好敏感。
香港保留廣東話作為官方口語,乃歷史產物,因殖民地關係,避開了全中國統一語言運動,呢場統一運動,將中國各地方口語貶為方言,只容許在社會、私人生活層面應用。至於香港,同樣有相對的方言,就是潮州話、客家話、鶴佬話、台山話以至新界圍頭話,通通都冇廣東話一樣官方口語地位。更重要廣東話與香港本土文化有特殊關係,正因為香港保留了廣東話作為官方口語,才有無綫劇集風靡東南亞及美加華人,亦因為香港強勢廣東話文化產品,行銷全世界,先造就咗香港在世界海外華人心目中,流行文化中心地位。
雙官方語言敏感性,在於背後本土與正統之間的政治角力,西班牙巴塞隆拿堅持兩種官方語言,西班牙語及加泰隆尼亞語,背後是因為文化歷史,加泰隆尼亞王國更早於西班牙統一帝國出現,而加拿大具分離色彩的魁北克省,一樣有兩種官方語文化,英語及法語,魁北克人一直有分離傾向。

影響力遠比普通話大

廣東話的文化版圖,影響力遠大於普通話,是屬於海洋中國人的世界,孫中山革命,背後支持佢大部份就係講廣東話嘅海洋中國人,呢個海洋中國文化圈,進取、肯接受新思想、有冒險精神,對內陸中華帝國而言,係危險嘅異端。
中國現時正處於帝國重建階段,會否容得下香港呢個「異端」?我估計北京未有計劃要香港全面推行普通話,取代廣東話,但香港人唔係儍,對廣東話背後嘅政治涵義好清楚,所以先至會抽秤教育局一篇文章並作出激烈反應。
因今時今日,內地正全方位地入侵香港,網民對「殘體字」非常反感,對香港四周充斥普通話廣播及殘體字通告也有不滿。今次如果真係發動起來,唔會少嘢,吳克儉,又開正你一瓣,小心睇車!盲舂舂將會激化事件。

添馬男