向來對政府一味唱好嘅《大公報》，噚日竟然一反常態「鬧爆」教育局。話說教育局日前被揭喺一篇文章話，廣東話係「不是法定語言的中國方言」，惹起好多人炮轟該局帶頭矮化廣東話，結果教育局前日急急刪文兼道歉，辣㷫《大公報》以一篇〈教育局「致歉」些什麼？〉嘅專欄文章諷刺一番。
文章形容今次風波，只係一啲傳媒同政黨「動輒上綱上線、歪曲事實謬論」，而教育局回應「廣東話是中文」只係等同「阿媽是女人」，批評局方回應令人摸不着頭腦。專欄認為教育局最需要澄清係香港法定語文係中文，廣東話係廣泛應用嘅方言。獲《大公報》開年嘅局長吳得掂，收到未呀？