今個新春，港產賀歲片《金雞sss》爆紅，但越紅越多爭議，最近更加捲入政治風波。話說除咗喺戲中着住哲古華拉tee嘅梁家輝、被指影射長毛梁國雄喺立法會掟吓嘢就可以收工，亦有網民不滿戲中講到無論撐抑或反政府，都係一律收錢示威，疑似「漂白」撐政府人士，網民炮轟導演鄒凱光（灘叔）用喜劇做「糖衣」包裝大搞抹黑。
八方問過長毛點睇被影射㗎，佢好大方話唔mind，亦唔會遷怒於梁家輝；原來長毛早前喺無家者世界盃嘅一個聚餐上，識咗梁家輝兼握手交談，佢為梁家輝講好話：「佢（梁）接到個job，要做呢個角色，咁冇得講啦，除非佢唔做㗎啫」。
灘叔fb引君如說話回應
場戲搞到咁大迴響，相信連長毛本人都始料不及。佢話相信今次風波係編導嘅問題；而佢自己查實不知道導演鄒凱光是誰，亦無意入場睇戲。佢話至今堅持每個月攞5萬蚊人工作抗爭同社運用途，亦唔介意人哋點睇佢。
噚日仲有人興波作浪，流傳梁家輝喺拍呢場戲期間表現抗拒，不過八方聽聞都係以訛傳訛嚟㗎啫。
唔知係唔係要配合主角金雞波濤洶湧，呢套戲嘅是非亦一波未平、一波又起。有網民接連發炮，話好不滿其中一場戲講陳奕迅同張家輝分別收錢示威，一個撐政府，另一個則反政府，似乎係想對「愛」字頭、黑社會收維穩費恐嚇反政府示威者行為「漂白」，有網民甚至嬲到聲稱要罷睇㖭呀。
八方噚日試過搵灘叔，可惜一直冇回覆。而灘叔則一度喺fb入面更新status話「君如：有咁多人喜歡你，就有咁多人憎你，共勉之」。
雖然冇正面回應網民不滿，但似乎係想引述君如撐佢嘅說話，作為回應。但唔知點解呢個status最後又刪咗。
mailto:[email protected]