在馬年第一次同大家見面，祝各位戰友身體健康，馬到功成！港股休市期間，外圍股市表現麻麻，新興市場股票基金更錄得兩年半來最瘋狂走資，睇嚟今日馬年港股紅盤都要跌市收場，希望可以做隻留前鬥後嘅馬仔啦！
蛇年首日推介翠華（1314）最多升67%，埋單亦進賬37%，可喜可賀，今年首日推介御泰中彩（555），希望可以延續旺勢。做得全年頭炮，當然有番咁上下斤両。御泰中彩擁有三大賣點，業務廣泛、估值便宜、概念十足。
先講業務，御泰彩票業務分為系統及遊戲開發，以及配送與市場業務，簡而言之即係一條龍全包，乃最正宗嘅彩票股，未來有任何政策支援，都肯定飲到頭啖湯。截至去年6月底止半年，御泰持續經營業務賺4.9億銀，按年增長13%，年度化市盈率僅10倍，比起估值最便宜同業匯彩控股（1180）折讓逾一成，其餘大部份更處於虧損階段，誰最抵買一目了然。去年上半年，中國彩票總銷售額達1,500億人仔，按年增長16%，其中體彩電腦票上升26%，配合今年世界盃年，相關投注肯定以幾何級數飆升，御泰肥過肥仔水。
睇圖表，御泰上月隨大市回調，但仍守穩上升軌，夠晒靚仔，一旦重上10日線，新升浪隨時展開，絕對係馬年逢低吸納嘅好對象。
唐牛