雖則馬年冇任何選舉，但有心喺2015年區議會同2016立會選舉出戰嘅人，都要開始部署嘞！好似有「西環契仔」之稱嘅法律超人謝偉俊Paul咁，如果要喺九龍東冧莊，怕且都要喺西環協力嘅基本樁腳基層盤外，開拓新票源。
八方聽聞阿Paul想喺馬年搞中產，希望拉攏到各區唔同界別嘅專業人士，開一檔中產組織，主打中產納稅人權益。雖然仲喺醞釀階段，但八方聽聞身為律師、上屆喺新界西選過立法會但落敗嘅屯門鄉事委員會主席何君堯，極有可能同阿Paul拍住上。據聞佢哋就快搵齊腳，準備喺2月底財政預算案前出爐，針對鬍鬚曾舉措點評一番。