長假期間孫柏文走去做吓啲宏觀啲嘅思考遊戲。其中一項就係玩角色扮演習近平主席，去估佢同其他領導人諗啲乜。點解咁做？當然就係為更有效去分配資金，即係投資啦。喺投資裏，當一個概念越係work、啱咗越耐，就會越多人跟住做，越做越大越攞膽，當勢頭變時就會越出事。例如「花旗國樓市只從二戰後未跌過」嘅trend一變，就全球金融海嘯。我哋香港人，日日都被官方或民間「教育」，話中共上上下下係會無所不用其極咁去維持話事權。因有個uncle曾經同我講過，不論你今日喺中共裏係乜幫派，共青、上海etc，他朝你都想自己個小朋友做太子黨。
一孩政策下冇人博
我唔係乜政治評論員、學者，我只係用微觀經濟學嘅誘因角度去諗，呢個uncle咁講完全正確，亦都係香港人信嘅真理。咁當個個官都希望小朋友做太子黨時，個誘因就係做乜都好，唔該有個譜，因大家都有stake，唔想共產黨冧，下一代有得繼續玩。但實施咗三十幾年嘅一孩政策，就衍生一個不可預見嘅後果。幾年前我聽大前研一話，中國未來就係今日嘅日本，日本早就自願一孩，衍生出嘅結果就係當你得一個小朋友時，佢就唔可以博，最緊要安全冇事。以前內地啲官生四個時就一個放洋三個博做太子，但當你生一個時就唔博叫佢離開大陸。咁當全國上上下下啲官，忽然對中共政權長遠冇咗stake，就會冇誘因去維護，亦即我哋香港人話齋：「不如屈爆部機去搵最後一轉錢。」
屈機最快就係貪污，貪污最快最易就係喺信貸泡沫下。故信貸泡沫亦成為歷代大國領導最怕嘅嘢，因為穩如蘇哈圖都可以一夜倒台，亦令傑佛遜嘆話：「對我哋呢個共和國嘅威脅，銀行家遠比鄰國舉兵危險。」借貸衍生嘅理財產品影子銀行系統就會遇到呢股想屈爆機阻力，因為大家要記得，主宰世界未來趨勢，冇力量大得過demographics。
孫柏文
獨立股評人
http://facebook.com/shuen
本欄逢周二刊出